kaólín: [Al₂Si₂O₅(OH)₄] er hvítleitt, þétt í sér og hálf límkennt. Það er aðaluppistaðan í kaólíni öðru nafni kínaleir sem er hvítt mjúkt duft og mikið notað við pappírsframleiðslu og postulínsgerð. Kristallarnir eru hexagónal og plötulaga u.þ.b. 0,1 til 10 µm í þvermál og sjást því aðeins í rafeindasmásjá; [kaolin, china clay].

Nafnið er komið úr kínversku og merkir „hár hryggur“ sem er nafn á hæð nálægt Ching-te-chen í Kína. Þar hefur efnið verið unnið í margar aldir.

Hér á landi finnst kaólínít við gufuhveri á jarðhitasvæðum.